دارميّات حب
إبگلبك فريج إجروح متحب أداويك
تعويلي مثل الذئب ما أمّنت بيك
***
جنسك ذهب مدغوش و طبعك طبع ذئب
جنسي أمل تفّاك من يرمي إيصيب
***
إشتل شجر بإلصوح و إنطر ثمر بيه
و الحاسد النمام بالك تباريه
***
تتعيّل و شتريد نضّمته حدّي
لا مرّه لا مرتين چندوب أعدّي
***
بس بعد جاك الضيم إكتب وصيّه
موتك گرب لتعود تهجم عليّه
***
ولّم لي إبره و خيط و أفدي لك الروح
نتعاون أنا وياك و نشل بإلجروح
***
لا تظن يوم أنساك لتخربص إبتوت
أتعاهد أنا وياك أحبّك لما اموت
***
ها چنّك إرتاحيت تغمز بإلعيون
يا ويلي أحبّك موت بيك أنا مجنون
***
شتريد أگمط الروح و انعي عليهه
طفله و تسل و إتموت لو ما تجيهه
***
هسّه أمّنت بهواي يا ريت أمر بيه
و نجلس وحدنه إبدار و إبراحه أحاچيه
***
إبعيد و لفاني الشيب و إشلون أمر بيك
لو تحترگ بإلنار قلمي اليطفّيك
***
أحس بإلفعل يفلان ناگص حنانك
سامحت بعض النّاس كلّه إعلي شأنك
***
الما يرضا ياخذ شور و لا يرضا أوصّيه
التايه إبدرب الموت چندوب أجر بيه
***
ماني طريح الموت وجعي إمن إذاني
خويه إنعم الله إعليك خلني إبمجاني
***
إبعيني مع الشمّات لتبزني إبعود
إشمالك تهم و إتلوع لو أني موجود
***
أويلي أحبّك موت و إبحبّك أهتم
بعيوني إتفدّاك لو غثّك الهم
***
الياخذ حجي الشمّات بالك تماشيه
نار و جمر و إبلليل تحرگ محاچيه
***
إيفر الگلب يرتاح لو جونه الأحباب
ينتگ ثلث نتگات لو دگّوا الباب
***
الشاعر بدر و اينور و إنجومه سر بيه
بالك تحرگه إبنار تخسر تعاديه
***
لا تشكي هم للغير لا تحلم إبعيد
إتحمّل الصعبات و الدمعة متفيد
***
ردتك ذخر بإلضيج من تجفي دنياي
إتهلهل لي بل طکّات بس توگف إحذاي
***
تتحسّر أنت إشبيك شنهي الجرالك
أبشرك إبشارت خير گلبي و هوالك
***
لو بيدي أنت إحذاي أصبحك و امسّيك
مثل الطفل لو جاع كل لحظة أمر بيك
***
أشوفك شمع بل بيت بعيوني ضاوي
أنت الگلب و الروح و أنت الچلاوي
***
أهلاً و سهلاً بيك و أهلاً بإلوياك
أفرش درب سجّاد يل گلبي يهواك
***
جاسم محمد الحسّاني 21/02/2025
:: برچسب‌ها:
دارميّات حب ,
:: بازدید از این مطلب : 6
|
امتیاز مطلب : 0
|
تعداد امتیازدهندگان : 0
|
مجموع امتیاز : 0
عضو شوید
عضویت سریع
آمار مطالب
آمار بازدید
