سفیر الحب

این الحقیقه؟

ادور اعلی الحقیقه مالگیت اشهود

افردش بالفکر واتناقش اوصافه

سهرت اللیل انونی و السبب مشهود

ضاع الوصف منی او تاهت اطرافه

محجوب الدرب واعیونی تعبانات

ما هود ضمیری او لا رفع راسه

الگمر  ویه النجم شافانی احترگیت

تقدم للفجر دنگله او باسه

المطر ینزل حجر واتراب فوگ المای

چفّن سر دلیلی او گمطه او شاله

الرعید ایغرد ابحسرات گلبی اردود

لمع باذیال حلمی و انشده باله

تحملت الندم واترجی بالدفان

گوم البس سترتک و ادفن اشعاری

وین الشمس خل تلبس ملابس سود

لان ضاعت الحکمه و انتهم جاری

دعیت البیه وفه الجربته سبع اسنین

یخیط اجروح گلبی او یرحم ابحالی

سئلته اعلی الحقیقه گلی کف الناس

ضاعت من زمان او ضل جسم خالی

خذت راگ النهر و اتربا للصیاد

یدور او ذب شبچته او عینی تربیله

یعمی ارجوک جاوب والحقیقه وین

گال ارتحلت او عد شیخی تفصیله

تعدیت السلف قابلنی عزراییل

قال اشبیک تتخطف علی اکتاری

شایلک حموله او تلهث او تعبان

تدعّم لیش لا بایع ولا شاری

حلفته او سئلته ادخیل ارید ادوای

ادور اعلی الحقیقه او ما نی لاگیهه

الصدگ لا وین اشوفه واستمع طرواه

کبرت اویه النجابه ابدمعی ساجیهه

قال ام الحقیقه بیت ابو بابین

باب اکتاب ربک ذکر تفسیره

او باب الثانی باب الشرک و التکفیر

احلل لک مثل و افتهم تعبیره

فهمت الدین واحد والسماء والگاع

الابحار الجبال الشجر و اسهوله

الملائک و الانس والجان و النسناس

صنع من ربک او بالعلم مقبوله

بعد چا لیش تجرم بالفلک هالناس

اذا دین الله باطل والکفر مطلوب

قتل النفس مو سهله او بیادر خیر

قتل الناس کلهه امقید او محسوب

للشاعر جاسم ثعلبی (حسّانی) 13/06/1393

03/09/2014

هوسات استقبال

هله او میت هله بالجای ، لینه او قاصد انشوفه

عزیز او بالگلب طاریه، او ثبت عدنه معروفه

شفیع او من نسل عدنان شاهد عملة الکوفه

یا محلی الضیف الضافانه

بسماتک تغسل بهمومی

***

یزغ نور القمر شفناه ، وصل واتعنه لخوانه

اجانه امفرج الحزنان ، یزهی ابعلمه دیوانه

عجید اتوصفه کل الناس، سیفه ابایده نیشانه

اهلا و انرحب جانه البیه هیبه

***

فرحان الگلب فرحان ، شاف ابعینه خطاره

زار احسین و العباس ، یا خوّانی من زاره

مثل یوسف وصل یعقوب ، او رجّع صیته الداره

اهلا بالضیف او خوانه

***

هوسه عندی ابحق اهلنه ، او کل عشایرنه ارد اگول

انتم اهل الغیره والطگ ، و انتم اتباع الرسول

انتم انصار الامامه ، و انتم الحق والحلول

صولات الطف تشهد بیهه

***

جاسم ثعلبی (حسّانی) 12/06/1393

جملات قصار

یا سلام ، الدنیا لو طیرها یطیر و ساکنهه بصیر و شاهدها خبیر، و حاکمها امیر ، کلها خیر فی خیر

اعتقد ربی خالقنی غیر طینة الاخرین ، لحیث: بادنی بشاره و حراره اذوب وانکسر ، یا ویلها من طبیعه متلونه.

العین بیتک و الهموم طریقک و الدموع شرابک و الناس نجوم فی حیاتک و علمک سلاحک تحت امر الذکریات.

تبسم للهوی ضاحکا ، ولا تستعین بمن لا خیر فیه ، وقد ترکک فریداً و ربک بالوجود.

الدار داران : دار الذله ودار العزه و هی المعاد و المعاد لا یجوز الی بما عاد ، فصن عینک و فسّر کلامک قبل الندم.

المطر لا یخیف من علی راسه جلید ، مثلهُ کمثل الرعید فی الربیع ، بلا سحاب لا یوثر و لا یفید.

النار مسله و العار مذله و النهار مجله و الحناجر اکهاف و الاصوات جمال الزهور فیهن من یعطر و منهن من یزال.

لسانک زبرجدا اصیل اذا باشرته بالکمال و التدبیر.

الدین مزهریة الروح و الایمان اعتقادک بضمیرک الحی فاذا عرفت نفسک عرفت خالقک.

آثار الدمار سبعه: ولدا عاق والدیه ، وعملٌ لا یطاق ، و بیت صغیر ، و شریک ملسون ، ورزقٌ یتناثر ، جارٌ سو، و دعائاً لا یقبل.

لذت الحیاة : رضایت الخالق ، بیتاً وسیع ، جارٌ هدو ، رزقاً متواصل ، شریکاً متخلق و مطیع ، ذریه صالحه ، احترام ارا الاخرین.

من الشاعر جاسم ثعلبی (الحسانی) 12/06/1393

اشعجب ما تذکر احبابک و لا جیت

ولا عینک تصد و اتحن ولا جیت

علی متحمله احس بیهه و لا جیت

گطعت الوصل ما تنشد علیه

***

اخو ردت النوده احلام وایتام

یزیل اهموم گلبی او سهر ویتام

یتیم او مهجتی المظلوم ویتام

شمس واینور ضیهم بالثنیه

***

ابن عمک ضخرگلبک والک دار

یزیل اهموم خلانک والک دار

الک بالدیره من سرک والک دار

یفیدک یوم لو طحت اببلیه

***

ذکرت احبابی لا طروا ولا جو

ولا بارض الفله ظلهم  ولا جو

علی بخلو احس هاجوا ولا جو

نمیم الناس طشهرهم علیه

***

اخوی المافگدنی ابفرح طر طر

مکانه برض روض الگلب طر طر

زرع باجفاه هجر منذور طرطر

یطرطر والطرور اتطر علیه

***

عرفتک ما تحب کل فتن واهلاه

او تحب الدله والفنجان واهلاه

علیک ابدا کلامی ابعطر واهلاه

حتی ابموتتی تحزن علیه

***

کلامک ما وصل ذکره وسره

حشیمک ما نصر عاجز وسره

لا هو زوده و ابراله واسره

انگطع حبل الوصل وافلکت بیه

***

حنانک دوم اکرمنه واداویه

واحب انغام ضحکاته واداویه

البخل باجفاک احرگنه واداویه

واخلی البیه وفه ایدچ بالثنیه

***

ضمیرک والوکت ویاک خنباک

جمعلک بالشماته اجناب خنباک

الیکرهک ما یلملک ربع خنباک

لگاک اصغیر و ایحم بالقضیه

***

یگلبی اسمح کلام الزفر واعداه

تعذر لا تغیضه ابهجر و اعداه

الیزهدک لا تکرمه ابزعل و اعداه

ابتسم له او ثبت الغیره الابیه

***

یگلبی اشمالک الهم دوم یملاک

غارق مرکبک لو عطل یملاک

علیک اتحسب اهل الفکر یملاک

لیهمک بحر لو زاد میه

***

جاسم ثعلبی (حسّانی) 12/06/1393

تستاهل اکرمک

حصدنه احباب بیدر و احنه ماشین

المنیه اسباب و اتجر ابقلمهه

علیمن یا عتب یا دمع یا نوح

العقول اضعاف و اتسلح زلمهه

***

شکینه امن الدهر لبّسنه جنحان

یرید ایطیر بینه او یبتلینه

تاسرنه ابدموع التجری بدموم

او سکتنه امن المراجل ما حکینه

***

اعتقد غالی اشتریتک و الوکت نار

فدیت الروح و اعیونی الجمالک

تستاهل اکرمک و انت قنعان

صرت بالذمه والقاصد حلالک

***

شوصفنک قمر و اعیونک انجوم

طفه نور الشمس من شاهدتکم

مثل یوسف حنانک طیفه یغنیک

او زلیخا ابحلم لیلی عاتبتکم

***

الکرامه اویاک  دمعه ابطن الجفون

المرود حب غزل حاجب عشقکم

الکحل منگاشه بیده او یطهی بالعین

او یثبت بالنظر واید یودکم

***

صرت صیّاد ترمی او تشلع اذنوب

 تدک قلعاتی وآثاری او حصونی

جرحت الجرحوه مرات الاجناب

او دمرت الگلب بالهم ینونی

***

غرقت اسنین وانت اتعاتب الروج

ترید الدیه تسلبهه الوصالک

و انه اهمومی فقیره اتعاتب الجار

اخذ کل شی التریده الله ابدالک

***

احبک یا وفی و اعیونک السود

او دموع الغیر ما نسلت گذلتک

لان بیتک مضیف او ابن الاحرار

اهل صیت او جلاله او حل عرفتک

***

جاسم ثعلبی (حسّانی) 12/06/1393

دارمیات مکملات
سم لو خنگ تردین یا روحی اطلبی
ظالمنی المحبوب او عایفنی ربی
***
سم لو خنگ تردین لو ضربه بالسیف
خل الخلگ ترتاح او تتعاشر ابکیف
***
سم لو خنگ تردین و اتخیری الیوم
اطلبی الخنگ یا روح بس کافی اللوم
***
سم لو خنگ تردین لو اغرگچ ابمای
ما ارید اشوف الخان لو صایر ادوای
***
 سم لو خنگ تردین لو چیله باللیل
اشوالچ اتموتین وی نجمة اسهیل
***
سم لو خنگ تردین ذلیتچ اهوای
عطشانه و اتموتین لا سم ولا مای
***
سم لو خنگ تردین ملینه یا روح
چا المن اتونین و اگلیبی مجروح
***
سم او خنگ واهموم ما موتاهه
اتجالع جویه الروح ذکرت هواها
***
ما اموتچ انه اهواچ یا روحی فوتی
نتعاون  انه اویاچ لو وصل موتی
***
ورده او شمع بالمای دزیته اعینچ
اطلبی الفرح والعید خاطر یجیلچ
***
جاسم ثعلبی (حسّانی) 11/06/1393

ما عندک وفه
تذم واتعیل  بیه والگلب مجروح
خیّطته ابضمیرک و ابرمش عینی
ما طاب الالم زاد الونین ابنوح
خزّن جرح گلبی وانت بالینی
یا مال البذلته او عمرت لی اقصور
مستانس ابحبک ما تحنینی
فگدتک بالفرح والحزن ما شفناک
تتشمت علیه او تلطخ اسنینی
دعیتک تفتره من شالوا التابوت
تدفن ذکریاتک وانت سابینی
علیمن شاد خشمک وانت حفنة مای
وآنه البیر کله شایله ابدینی
علی شانک غریب اصبحت واطلب ثار
نایم مندحس و الفرگه تلوینی
اعاتبلی جبل ما هزه صم اتراب
تتکبر لمن و ابرمشک ارمینی
شایف کل محبه او ضفت کل محبوب
بس بحرک نشف بالهم یعازینی
بارک بالخیانه او تنتظر مجنون
ما عندک وفه اتندم او حاچینی
دفنت اسرار بالحب ما دفنهه المای
و انت اترید بسرارک تبچینی
اترکک یالبعتنی ابامر عزرائیل
اذا بلقیس دینک بالسماء ادعینی
سلیمان النبی ما خالفته ارجال
و ابقصره الزجاجی ارسم دمع عینی
جاسم ثعلبی (حسّانی) 11/06/1393
01/09/2014

فتلت السهر

الوم اعلیک المن وآنه راعی الصوچ

علی الما یسوا المن روحی محترگه

شفته ایغازل انجوم السماء باللیل

و آنه انطر علیه او مثلی ما یلگه

فتلت السهر و اعیونی غزل منقوش

تشنط گلبی ظالم بیدک اتعلگه

اعلمک واندعیلک وانت الغرگان

تزامطنی ابروجک من هو الیغرگه

شتلیت الورد وایغازل البستان

تشلع بالثمر و الحاصل اتحرگه

الحد من هالعناده یا یا غریب الدار

لو بیدک ابهاون گلبی اتدگه

جاسم ثعلبی (حسّانی)10/06/1393

غالب الهرم : شعر هرم مثلث ، خماسی ، مختلف القافیه

یا غریب

ابکل مدینه کن ادیب

لا تعثّر سفرتک انت المجیب

قلبی مو شاشة قمر یزهی او یغیب

ردت انصحک ردت ارشدک و اعتقد طیف حبیب

وصفّیتک

لو ادیب او عالی صیتک

صیر قاضی للعداله مو غریب استرشدیتک

اترک البایع حلاله او هایم ابدرب الرذاله شوقیتک

مثل مضروب ابجمالک یا هلال ابظلمه یزهی عربی وامعدل لقیتک

کلشی حاصل

الظلم و اعداداته واصل

و التمنی النار حتماً فکره ناصل

و التعده اجبال و ابحار الملامه رشده فاصل

الجنه ما تعتاز کل تایه طریجه او ذم رفیجه او لیله ما صل

یا غریب ، او وصفیتک ، کل شی حاصل

ابداع جدید لغالب الهرم من

الشاعر جاسم ثعلبی (حسّانی) 10/06/1393

مثلت بمعنی ثلاث هرمات

خماسی بمعنی کل هرم لها خمس مصاریع

وشکرا انتظر انتقاداتکم .

ابو ذیات لیلیات

الدهر لو ما سمح للعقل یمنه

تعثّر بالمصایب سهر یمنه

صحیح الود بناله قصر یمنه

ولاکن ما رسم خط للخویه

***

الوکت دردش علیه اهموم وابلی

غریب او ما رحم ویای و ابلی

وحق من عطّش العودین وابلی

ما اخاف الغدر حد المنیه

***

الدهر بهموم خلانی بلانی

ما انسا الفضل قطعاً بلانی

انا اموفی اسهرت لجلک بلانی

اخو بالضیج دمی ایحنی ادیه

***

غریج او روج بحرک قبر ضکنی

ما عندی خطا و اتلوم ضکنی

حلو مثل الشهد یا قال ضکنی

تجدنی الوفی او حارص بالثنیه

***

یدولاب الدهر بحشای نم نم

جعلتک بالگلب ناطور نم نم

اریدن لو یبس شفتای نم نم

عشت ویای و اتدلل علیه

***

امیر او ما جفل گلبی ولا دار

ولا حب فتن بالدنیا ولا دار

علی الطیب الذهب بعته ولا دار

ارید الله او علی یرضی علیه

***

السخاء و الکرم بجفونک یلولن

وفیت او شاهدت طیبک یلولن

شفت قطرات بعیونک یلولن

کلک ذوق ما عندک ردیه

***

الشعر ما طفی کل ناری ولا هاد

قصاید فجرت و انغم ولا هاد

ما شفته جلی ابهمی ولا هاد

بس قلبی چواه او عم علیه

***

احب حرف السلا دایم ولامن

علی احبابی یحن قلبی ولامن

زرعت الطیب محصولی ولامن

رضیت ابکل حکم یصدر علیه

***

نحب بالوم زایل وانتمنی

القلب ویاک تعلم وانتمنی

علیمن جارک ایوم ونتمنی

رحلنه او ما نسه طیب الثنیه

***

شجاک اشغیرک تعتب علیمن

اشجنیت ابصدقتک یسمر علیمن

وحق صهر النبی و اقسم علیمن

جفیت او چردست جورک علیه

***

غرقت ابکثر صب دمعک و جوراک

رحلت او ما ندل ادیارک وجوراک

بلم متحمل اهمومک و جوراک

اشعلتنی ابنار ما عندک خویه

***

جاسم ثعلبی (حسّانی) 09/06/1393