سفیر الحب

غزل ملمّع باسم ربیتک شهم

ربیتک شهم تتهاوش اویه الموت ، وین الموت ضل مبهوت

واتفلش الستار الیهتک اضنونی ، اجانه الفرح حیولــــــــــه

بزق نور الشمس بارض الفله و الجار ، لا محتار لا دینار

او فرحت ابزفته من کحّل اعیونی ، اجتنه اخبار منقوله

العلم بیده او یهوس و العتب دفناه ، بیده السیف راح اویاه

و ابطن المعارک نجمه تلگونی ، اشترید اتگول معقوله

یتبارگ لمع خده او یجر بطوار ، وین الدار وین العار

و ایفلش الصخر صیحاته الحگونی ، ونینه ایفزز الثوله

شایل کل ضمیره او شاری العز بیه ، کلمن یندعی ایداعیه

من داعه الوفی خلهم یداعونی ، کلام او شفته مزیونه

راچب عالمنصه او بیده مشعل نار ، طیر او طار حار المار

علی الداسوا بختهم و الیضرونی ، رساله ابعنقه محموله

ما نام البخت و الکرسی بید اجناب ، الحر ما تاب

تتکسر عبرته امن الیعازونی ، القوه ابهمته مفتوله

دگ اعلی السدر متحمس الدیوان ، یا خرسان یا فرسان

خل ایدک ترفرف فرشه لسنونی ، قضیه او باسمه محلوله

ما شارب خیانه او لا یلف بالحاف ، شاف او ضاف

اریدک نار کبری اعلی الیمسونی ، الشجاعه العنده مبذوله

جاسم ثعلبی (الحسانی) 15/06/1394

06/09/2015

اغنیه لا تسافر

جای تتشمت علیه ، او گلبی محروگ ابهواک

یا حسافه او راسی شیّب ، عمری مرهون ابلقاک

من رحت ما ودعتنی ، انطر ابدربک عفتنی

ابرمح عدوانک صدتنی ، ما هناء جرحی ابشفاک

***

امسافر او عینک جویه ، اعیونی صبّن من حنانی

شایل اهمومی بدیه ، او گمت اون آه یا زمانی

الناس تتحسف دلالی ، او بالحجر ترمی اعلی حالی

یا حبیب ابگلبی غالی ، خذنی لدیارک معاک

***

اتمرمرت و انشد لی رمشک ، خنت لو باقی ابوفاک

مو گلت دمعه اعلی عینک ، تجری بخدودک دواک

انظر الصوره ابغیابک ، گلبی متحمل عذابک

لا تعطّشنی ابسرابک ، او روحی مسجونه ابسماک

***

لا تسافر ما اودعک ، عید لی البهجه ابضمیرک

اسمع او فسّر کلامی ، حاول او قرر مصیرک

الغربه صعبه او شاهدتهه ، حسبت و انت الردتهه

بالخطر روحک سمتهه ، تابعت خطوت رضاک

***

جاسم ثعلبی (الحسانی) 14/06/1394

05/09/2015

بطلب من الفنان قاسم الاسمر و الاخ صادق البو غبیش

فی حین الاستفاده یرجی ذکر اسم الشاعر و شکرا.

ابوذیات رکن الحیاة

صنعت الکم مبانی اسلاف و ارکان

او سمعت اصیاحکم و الطاف و ارکان

اشجنه الخاسر کرم و اعبود و ارکان

لطمت احلوگهم بثنین ادیه

***

الزلم تتلاگه بالمیدان و اتفوز

ابشجاعه و ابعلم تستعر و اتفوز

الیرید ام العلی بالسفر و اتفوز

الیعرعر بالسجن داره المنیه

***

علی اسباع المکارم من هو دالک

اکل و اشرب معالم من هو دالک

لحد آخر مظالم من هودالک

احترامک طال و انت اتعیل بیه

***

دخلت اببیت مچمنّه و سرنه

او علی طور الفرح غرنه و سرنه

ترید اتضوگ عزّتنه و سرنه

تعال اویای خل نسهر سویه

***

جاسم ثعلبی (الحسانی) 12/06/1394

03/09/2015

غزل حب امی

اخذ گلبک حبیبی او خلنی لحظه ارتاح

انسجن گلبی ابطن نارک او ماذینی

خلنی اشتم هوی امی الدللتنی ابعوز

او ذکرت ارباها و ادموع التبچینی

بس انطینی فرصه بس ابوس الاید

و اقدام الحمتنی ابروعه خلینی

های امی الحنینه الما تنام اللیل

تضل سهرانه لو سخّن دمع عینی

های امی الکریمه الما تسد الباب

ابثدیها ایدر لبنها اببسمه تسگینی

های امی الوفیه الما تخون القول

تغص لو شافت الجوع او کثر دینی

های امی السخیه و ابفکرها العیش

ترحب بالهلال او کثرة اسنینی

یتیم الفاگد امه و العرس زفاه

جسمها بالگبر و ایضل ینادینی

لاجل مرتک کرهت الغیره و العنوان

او طرت برموش عذالک تحاچینی

های البیهه برکه او عدهه سبع البار

تنتظرک تمرها او لا تعازینی

جسد ضلت رمیه و الوساده اتصیح

وینک یبن حبها ابدهره ترمینی

تعاین عالدرب باسمک تفز واتگوم

من تسمع کلامک تروی تمکینی

صبحت اولید مرتک و الدهر و النار

تظلم لیش و ابعیدک تحنینی

علی لج الزمان انطق و اصیح ابصوت

حب امی قمر ضاوی ابدمع عینی

جاسم ثعلبی (الحسانی) 08/06/1394

30/08/2015

غزل طیر الحمام

انا امفارگ محب بیه ریحت احلی ایام

نزف گلبی اعلی موده او غرگت احلامی

والدم للرچاب او ما یهاب الموت

اندحر طیر الحمام ابکثرة انغامی

انا امفارگ حبیب او عندی شمعه ابللیل

گمر و اینور ضیه او یکتم اعلامی

انا امفارگ حبیب او ما انام اللیل

سهرت اویه الشعر من تحسر اقلامی

ادگ و انثر قصاید و اعذر الشمات

الورگ بچیته بیدی و الگلب دامی

و اصیح الله و اکبر عینه صلفه اویای

یبچّی الطفل ضیمی او بالرمش رامی

یعذبنی غفل و امطرز ابحسرات

او یغرّگ روض عگلی ابسرعته او حامی

تاسرت ابجماله او طوله او ممشاه

او سجدت الحضرته باشعاری و اسهامی

او طلبت اوصل ثنیته ابسید او عامی

جاسم ثعلبی (الحسانی) 03/06/1394

25/08/2015

قصیده خطفه من حرب الطف

ابطن الگلب یحسین عندک تحیه

و ابدم کتبته او فاح بالغاضریه

***

امن ابو الحسنین اجیب اوصاف و الطاف

انتبارک للقصد و الشاف و الطاف

الشهاده اتکملت بالضاف و الطاف

الحرم و النوگ و اجساد البریه

***

الک یحسین ابیع الگلب و اجره

او علی درب الصراط افتخر و اجره

فدایه افدی العمر و انتحر و اجره

او هدیت الروح للزهراء الزچیه

***

عجز وصفی عن العباس من هاد

العلم و السیف ضل یرتجف من هاد

انشخل صدره ابرماح الغدر منهاد

او اید الثانیه مرمی الثنیه

***

اشگد احمل الم متروسه روحی احزان

او یا دم الشرب غیض الیعادونه

الطف نیرانه تلهب و الغدر مکتوب

متحسده الجماعه اعلی الیحبونه

الحسن دار الکرامه او بیت الیعزبون

و احسین الشرف بالکوفه تلگونه

و ابو فاضل شهامه او دین الیحلفون

اچفوفه امگطعه او بالغیره ممنونه

من هز العلم من ودعوا ممشاه

لگف سیف العداله او جرش طاعونه

اسد و امدرّب الحومه او زحف للگوم

حاط اهل السقیفه او ترس ماعونه

رجع و البسمه تلهث من ثنیایا ارباه

او شاف ام الغضب باچتافه مسجونه

او ذکر چلمة حبیبه ابیوم دگ ارچاب

اتجرّح بالوفاء و امضمد اعیونه

قاد المعرکه او سابگ مهب الریح

ما هم ابضرب جیش الیکرهونه

هز سیف الامامه الما تشیله اشباح

انغدر من چانت اضباع الیبارونه

گطعوا چف یمینه او حولاه السیف

بالیسرا انفجر دمه او یحنّونه

او طاح اعلی الارض متوسد التربان

او ضل یبراله یمه ابحربه میمونه

صاح الله او اکبر وین اخوی احسین

اجاه او قبلّاه او غمض اعیونه

او صرخ صرخه عظیمه اهل السماء سمعوه

انکسر ظهری و اخوی امهمشّه امتونه

الذنوب اجبال و ایزید الغدر باحسین

ابطمع و ابمال یا حلم الیفسرونه

***

میشوم الدهر میشوم خان احسین و اعیاله

غفت شمس الظهر بالغیم من رگصت الچتاله

خّوانه او عمامه اجساد من شد جرحه من شاله

و الراس ایضل تاج الشیعه

***

جاسم ثعلبی (الحسانی) 02/06/1394

24/08/2015

غزل تشرگ بیه

اشگد مشتاگ الک یا ریت اشوفک یوم

و ابوسک بالحلگ و اشرب دمع عینک

و اتهنی ابجمالک و البس العبرات

و اگلک بالهمس لا محنه ناسینک

لا تنشد علی خلینی مصفی اذنوب

او خلینی ابونینی او سهرة اسنینک

العتب سویته مرود و الکحل عتبات

او تخربص بالجفن و اتسدد ابدینک

غفیت ابطن نارک محترگ باهواک

تمل یسراک تشعل گلبی بیمینک

صرت طیر ابمصیرک محتضر للموت

سچاچینک تکر الجاهز ایعینک

تواعدنی ابسفر و اتبرر الشمات

انغدرت او ما عرفت ابزینک او شینک

ولک موگد صرت و انه الجمر مشعول

چویت الّی یمسّک و الی ایهینک

تدلل علی شاربنی جرعة مای

تشرگ بیه تشرگ بینی او بینک

جاسم ثعلبی (الحسانی) 01/06/1394

23/08/2015

غزل کتلت المستحی

تمر عالبال لحظه او تاخذ الــــــــروح

او تدوس اعلی الگلب وانت وابچانک

ولک سلیت منک و الله یبلاک

کتلت المستحی ابلمضة لسانک

لبست الشمس من عادیت النجوم

او حرگت ام الوفاء او نار ابسنانک

خاتل بالکهوف او ترمی الرماح

تثبت للخلگ حقدک حنانک

اعلّم ما تتوب او انت خسران

کل هذا او صرت مثله الزمانک

طفّیت  الزعل باشرتک ابلوم

او طویت اعلی العنق بیدک عنانک

تضل اتطوف تفتر شمعه باللیل

او حرگت ابلا رحم عجدة بنانک

ولک گلی اشلفاک اتولد اهموم

قبل نور الگمر یفشل رهانک

سفن حمّل اگلیبی او بحرک الهاج

ما اغرگ ولک گطنه او بذانک

جاسم ثعلبی (الحسانی) 31/05/1394

22/08/2015

ابیات تخص العمام

یا عمام التسد فیه یا عمــــــــــام

اشگالت ام عصابه بیهم یا عمام

انتظر عطشت املهم یا عمام

و انا بیه النار تسری احزانها

***

الخوه عامود او مراحب مو حچی

اعلی الچتف طخ الخویک و انتچی

الدشه تغسل ضیم گلبک و البچی

غار ابن حسان هز ارسانها

***

اخوتک کالسفینه او روج ذاتک ممتحن بیها

و ابوکت الشداید عود ترید الخوه راعیها

همه سیفک ابیمناک للگوم التعادیها

بس لا یتحسد من شاله

***

الدنیا اتحشد ابهمی و لدها

لان کل ضمی البگلبی ولدها

صرت مثل الذی یغرگ ولدها

او تشوفه ایطبطب ابدار المنیه

***

جاسم ثعلبی (الحسانی) 01/06/1394

23/08/2015

دارمیات افراح و ارباح

اهلا و سهلا بیک یالقدرتـــــــــــــــنه

عید او عرس و اشواق مجتمعه عدنه

***

مبروک الف مبروک یا موسی مبروک

یوم الزواج او عید بین الیحبوک

***

اهلا و سهلا بیک جیت ابفرحنه

نشکرها منک دوم یالقدرتنه

***

لبسینا ثوب العید و الهم نزعناه

عرسک یبو سجاد چنه انتمناه

***

مفترهه روحی الیوم مشتاقه الفراح

گلبی ابسرور او خیر ما هود او صاح

***

بالک تحشم الغیض و الشامت احذاک

خلینه نفرح یوم گول الله ویاک

***

بالک تمر عالباب یالعذبتنی

شارد و افکر بیک سمچه او صدتنی

***

ملینه من القیل و امن الشماته

ما نفتک امن الناس کلمن او ذاته

***

هیعونک اصغیرون ما تعرف الموت

بلعانی دهری الیوم سمچه ابطن حوت

***

ریت الحبیب الیوم یتعنه اشوفه

عطشان افکر بیه ما ضنتی اعوفه

***

مر وانشد الدلال حبّک ولا تاب

ما شفت لما جیت فتحالک الباب

***

ما اریدک او لا ارید حچیک یطماع

تحلف لی بالعباس و اتبدل ابساع

***

اتعذبت و اتمنیت موتک گرب لیک

جاهل تطشر اسرار ما ودی اماشیک

***

للصبر عندی احدود لهمیته ما فاد

صبرته بالصعبات خاویته ما عاد

***

بالک تعذب الروح بالک تذلهه

للبیه وفه و الذات ینگص فضلهه

***

یا ربی وین انروح گصّر عمرنه

بوگ او ظلم و الخوف طشّر نزلنه

***

حر او فقر والموت مفتر علینه

امیّه ترعی اصخول اتچتف بدینه

***

لا تعتب اعلی الروح زعلانه منکم

متمرضه خمس اسنین ما هل جفنکم

***

ما اود اشوفک یوم تفتر بالعجود

حافی او تشتم الناس اشمالک یمگرود

***

جاسم ثعلبی (الحسانی) 18/05/1394

09/08/2015